Triptikoa eta Post-Data
I
gutun ziren hitzok inork inori inondik inora helarazteko idatziak galdatzen didazu kontzeptu bat definitzeko izatearen arrazoia argitzeko hitz ustelak baino ez zaizkit geratzen hezetasunean eta iluntasunean hazten eta ugaltzen direnetakoak helbideak oro galdu ditut badaezpadako igorle naiz orain okerreko hartzailedun poema batena
II
ez dizut kontatu katagorriak ikusi nituela parkeko zuhaitzetan haurren eskuetatik jaten hamarnaka ehunka milaka uso ere ikusi nuen agure baten bueltan pilatzen urmaeletik zetozen harengana igerian ahateak eta antzarak agurearen eskuetatik jausitako papurrek deituta hegazti batzar horren ertzean bele bat zuhaitz bateko adar batean pausatuta bakarrik zain zaindari beleari eguzki-kontra ateratako argazkia erakutsi nizun murtik ere ez katagorriez haurrez usoez agureaz ahateez antzarez egurrezko bankuan jesarrita bazkaltzen ari ziren eskaleez familiez bikote bakartiez iluntzen ari zen zeruaz tristuraz laino arteko eguzkiaz honen itzaletako beleaz baizik ez nintzen mintzatu eta zuk esan zenidan goiza lanean igaro zenuela lan egiten saiatzen
III
absentziaz oroitzea absentziak hartzen du zure tokia absentziaz oroitzea zigarreta azalean amatatzea da plazeraren uberan datza hustasunak egonezinak oroitzapenak zauri dira sendatzen utzi ezean
IV (post-data)
gure demonioak ez datoz DSM-5ean zerrendatuta hitzak ezin gertura daitezke azalpean jazotzen den anabasara nire baitarakoa da hustasuna gutun hau bertan galtzen da
Trépanos 